లండన్:
ప్రపంచవ్యాప్తంగా ఇంటర్నెట్ రంగాన్ని ఒక తీవ్రమైన సైబర్ భద్రతా సంక్షోభం కుదిపేస్తోంది. వర్డ్‌ప్రెస్, జూమ్లా వంటి కంటెంట్ మేనేజ్‌మెంట్ ప్లాట్‌ఫారమ్‌లు సహా అంతర్జాలంలో దాదాపు 70 శాతం వెబ్‌సైట్లకు ఆధారమైన 'పీహెచ్‌పీ' (PHP) ప్రోగ్రామింగ్ లాంగ్వేజ్‌లో రెండు అత్యంత ప్రమాదకరమైన భద్రతా లోపాలు వెలుగుచూశాయి. అత్యవసరంగా భద్రతా ప్యాచ్‌లు వేయలేని సంస్థలు తమ సర్వర్లను తాత్కాలికంగా షట్‌డౌన్ చేయాలని అంతర్జాతీయ సైబర్ ఏజెన్సీలు ఆదేశించడంతో విస్తృతంగా అంతరాయం ఏర్పడింది.
ఏఐ పరిశోధనలో బయటపడ్డ దశాబ్ద కాలపు లోపం:
ఓపెన్ఏఐ 'ప్యాచ్ ది ప్లానెట్' చొరవలో భాగంగా సైబర్ సెక్యూరిటీ సంస్థలు 'విజ్' (Wiz), 'కాలిఫ్' (Calif) అధునాతన ఏఐ సాధనాలను ఉపయోగించి ఈ సమస్యను కనిపెట్టాయి. దశాబ్దానికి పైగా గుర్తించకుండా ఉండిపోయిన ఈ లోపం.. హ్యాకర్లు సర్వర్లలోకి ప్రవేశించి ఎలాంటి ముందస్తు అనుమతులు లేకుండానే రిమోట్ కోడ్ ఎగ్జిక్యూషన్ (RCE) ద్వారా మాల్వేర్‌ను ప్రవేశపెట్టేందుకు వీలు కల్పిస్తోంది.
ప్రపంచవ్యాప్తంగా అత్యవసర చర్యలు:
ప్రభుత్వ వెబ్‌సైట్లు డౌన్: ఫిన్‌లాండ్ ప్రభుత్వ పబ్లిక్ సర్వీసెస్, నెదర్లాండ్స్ పార్లమెంట్ మరియు అక్కడి నేషనల్ సైబర్ సెక్యూరిటీ ఏజెన్సీ తమ అధికారిక వెబ్‌సైట్లను ఆఫ్ చేసినట్లు ప్రకటించాయి.
గ్లోబల్ పోర్టల్స్: వికీపీడియాను నిర్వహించే వికీమీడియా ఫౌండేషన్ ముందస్తు జాగ్రత్తగా పలు వ్యవస్థలను నిలిపివేయడంతో కొందరు వినియోగదారులకు పేజీలు అందుబాటులో లేకుండా పోయాయి. బీబీసీలోని పలు ప్రోగ్రామ్ పేజీలు, ప్రముఖ ఆర్ట్ ప్లాట్‌ఫామ్ డీవియంట్ఆర్ట్ కూడా తాత్కాలికంగా సేవలను నిలిపివేశాయి.
భద్రతా సంస్థల అలర్ట్: అమెరికా ఎన్‌ఎస్‌ఏ, బ్రిటన్ ఎన్‌సీఎస్‌సీ, జపాన్ ప్రధాని సనాయ్ తకైచి వెబ్‌సైట్ నిర్వాహకులు తక్షణమే తాజా సెక్యూరిటీ ప్యాచ్‌లను అప్‌డేట్ చేసుకోవాలని హెచ్చరించారు. పీహెచ్‌పీ 8.1 లేదా అంతకంటే పాత వెర్షన్లను వాడుతున్న వారు అత్యవసరంగా తాజా వెర్షన్లకు మారాలని నిపుణులు సూచిస్తున్నారు.
